CAPIZ – Ginahulat na lang ang pinal nga assessment sang Central Administration sang Capiz State University sa mga nakit-an nga minor damages sa pila ka mga istruktura sa Tapaz campus kag Dumarao campus matapos nagtay-og ang linog sang Setyembre 30.
Sa interview sang Bombo Radyo kay Christian George Acevedo, Public Information Officer Director sang nasambit nga unibersidad, iya ginpahayag nga may yara sang litik nga nakit-an sa conference room sang Tapaz campus kag temporaryo nga indi anay ini maggamit tubtob indi pa madeklara nga safe ang area.
Suno kay Acevedo, may yara man sang gamay nga litik nga nakit-an sa pila ka mga classrooms sa Dumarao campus kag wala man anay ini ginagamit sang mga estudyante.
Pahayag niya, wala man sang major damages nga nakit-an sa mga istruktura sang campuses sang Capiz State University.
Nahibaluan nga gilayon nagpatigayon sang inspection ang disaster risk reduction and management council sang unibersidad pagkatapos sang nabatyagan nga linog.
