ROXAS CITY, CAPIZ – Wala maapektohan ang mga pasilidad sang Capiz Electric Cooperative (CAPELCO) kasunod sang magnitude 6.9 nga linog sa diin nabatyagan ang Intensity IV sa Capiz.
Sa interview sang Bombo Radyo kay Engr. Edgar Diaz, General Manager sang Capiz Electric Cooperative, iya ginpahayag nga naka-eksperyensya lamang sang isa ka oras nga power interruption ang pila ka mga lugar sa probinsya kadungan sang linog sang Setyembre 30.
Suno kay Diaz, ang power interruption nga na-eksperyensyahan ang tuga sang linog nga nag-apekto sa Cebu kag Negros nga koneksyon sang National Grid Corporation of the Philippines rason nga indi maakomodar sang power plant sang Panay ang tanan nga demand sang kuryente sa isla.
Sa subong, balik na sa normal ang supply sang kuryente sa bilog nga probinsya sang Capiz.
