Luwas kag accounted ang ang tanan nga mga Pilipino sa Ukraine kasunod sang panibag-o nga missile kag drone attack sang Russia sa Kyiv, suno sa Philippine Embassy.
Base sa report, apat ka mga indibidwal ang napatay kag indi naman magnubo sa 100 kantawo ang pilason.
Sugod sang nagligad nga katapusan sang semana, ang embahada padayon nga nagabantay sang sitwasyon sang magagmay nga mga komunidad sang mga Pilipino sa Kyiv kag iban pa nga mga syudad sa Ukraine.
Una na nga ginreport nga ang Russia ang naglunsyar sang serye sang mga pag-atake sang gab-i sang Sabado, Mayo 23, gamit ang mga drone kag hypersonic Oreshnik intermediate-range ballistic missiles.
Ginpagwasak nila ang dinosena ka mga puluy-an, eskwelahan, merkado, kag isa ka museo sa Kyiv.
Ginkumpirma man ni Ukrainian President Volodymyr Zelensky nga Wala na-intercept sang ila nga air defense ang tanan nga ballistic missile, nga ang kalabanan sini hungod nga ginpuntariya sa kapital.
Suno sa Russian Defence Ministry, ang pag-atake bilang balos sa ginaalegar nga pagpamomba sang Ukraine sa mga sibilyan nga pasilidad sa sulod sang Russia, isa ka alegasyon nga hugot nga ginpanginiwala sa bahin sang Ukraine
