ROXAS CITY – Magkatuhay ang nangin reaksyon sang mga residente sa America matapos nga ginpasaka ang impeachment trial batuk kay US President Donald Trump.
Sa interview sang Bombo Radyo Roxas kay Bombo Correspondent Oswald Clement Diesto, isa ka chef sa California USA, nga ginaistoryahan karon sa ila pungsod ang pagpasipa sa puwesto sang Democrats kay Trump.
Suno kay Diesto nga madamo sang mga residente sa America ang nagapatigayon sang hublag protesta bangud sa nagakatabo karon sa ila gobyerno sa idalom sang administrasyon ni Trump.
Ini bangud lapit nalang matapos ang pagpresintar sang mga Democratic House Managers sang ila mga ebidensiya batuk kay Trump.
Ginpahayag sini, nga may yara sang nagkalain-lain nga mga reaskyon ang kada mga residente sa America kun sa diin ang iban sa ila nagapati nga wala sang ginlapas nga laye si Trump gani indi dapat ini pagsipaon sa puwesto samtang ang iban naman pabor sa ginahimo nga tikang sang mga Democratic prosecutors batuk sa nasambit nga presidente.
Nabalaka man ang iban nga mga residente sang America bangud magadala lamang ini sang peligro sa constitutional framework kag sa nagahilapit nga 2020 presidential election sa ila pungsod.
Samtang, suno kay Diesto indi naman apektado ang ila trabaho sa America bangud “business as usual” sa gihapon ang sitwasyon sa nasambit nga pungsod.
Nahibaluan nga si Trump ang ikatatlo nga presidente sa kasaysayan sang US nga nagapangatubang sa impeachment trial kun sa diin gin-akusaran ini sang abuse of power kag obstruction of Congress bangud sa pagpa-imbestigar kay anay US Vice President Joe Biden sang gintawgan ang presidente sang Ukraine.
