ROXAS CITY – Tubtob subong nagakinasadya sa gihapon ang mga pumuluyo sa Colorado sa kadalag-an sang Denver Nuggets, sa gintapos nga Game 5 sang 2023 NBA Finals.
Sa interview sang Bombo Radyo kay Bombo International Correspondent Joy Genobiagon, direkta sa Denver, Colorado, USA, ginsiling sini nga madamo didto sang mga Filipino ang kaangay nagdaog man sa lotto sa kadalag-an sang Nuggets matapos ang 47 ka tuig nga pagtinguha nga maangkon ang kampeonato sa NBA.
Sa pihak nga bahin, ginpahayag ni Genobiagon nga sa kustodiya na sang Denver police ang suspek sa pagpinabuang luthang sa natabo nga shooting incident sa Market Street sa bisinidad sang Arena nga ginhampangan sang Nuggets batuk sa Miami Heat.
Suno diri, indi pa klaro kun ano ang motibo sang suspek sa pagpangluthang nga ginkapilas sang siyam ka mga tawo kalakip ang tatlo ka mga kritikal sa ospital.
Apang bangud legal ang pagbitbit sang armas-luthang sa amu nga lugar posible nga may kaangtanan ini sa ginhiwat nga hinampang.
Ginpakigbahin man sini nga wala sang Pinoy nga naulamid sa insidente bangud nahibaluan na sang mga Pinoy suno diri nga posible ang kinagamo sa tion sang kinasadya.
