ROXAS CITY – Nagakabatyag sa gihapon sang kakulba ang pila ka mga Overseas Filipino Workers (OFW) sa Israel, sa tion nga magtunog ang ila tagsa-tagsa ka mga siren, patimaan nga may nagapadulong nga missile, apisar nga indi na bag-o ang kaangay nga sitwasyon sa nasambit nga pungsod.
Ini ang ginpahayag ni Mr. Ralph Veloria, Bombo International Correspondent sa Jerusalem, Israel, sang mainterview sang Bombo Radyo.
Suno diri, malayo siya sa ginaluntaran sang baslanay sang pagpalupad sang rocket ukon missiles sa Gaza strip– nga border sang Israel kag Gaza, nga estado sang Palestine.
Apang sa iya pagpanalawsaw sa mga Filipino nga malapit sa Gaza, nga indi ang mga ini makatulog sa kagab-ihon sa tion nga naganilupad ang missile, apang wala man sang casualty sa karon sa Israel magluwas sa mga suldado nga nagkalapilasan.
Nahibaluan nga liwat nga nag-ibwal ang tensyon sa Israel kag Gaza sang Biyernes nga adlaw, matapos nga pwersahan nga ginlunsyar sang Jewish state ang isa ka pre-emptive counter-terror operation batuk sa pamahog sang Palestinian Islamic Jihad (PIJ), pila ka adlaw matapos naaresto ang isa sa ila miyembro.
