ROXAS CITY – Sa pihaksang pagkabalaka sang pagtaas sang death toll adlaw adlaw sa Italya, bangud sa coronavirus disease (COVID-19) nakakita sang pamaagi agud indi ma-bored ang mga Pinoy nga stay-at-home sa karon sa ila mga balay sa Italy.
Sa report ni Bombo International Correspondent Billy Cars, isa ka caregiver sa Rome, Italy, ginpahayag sini nga para indi matak-an naga-tik tok na sila sa balay, isa ka dance craze nga uso sa karon.
Aminado si Cars nga nasubuan kag nabalaka man ini sa nagakahinabo sa Italya, apang ginatan-aw na lamang sang mga Pinoy sa positibo nga aspeto sang kabuhi ang hitabo sa diin may panahon na sila nga maka-estorya sa ila mga mahal sa kabuhi sa Pilipinas nga wala nila mahimo sadto bangud sa ila kasakuon sa ila nga trabaho.
Suno kay Cars nga sarado ang tanan nga negosyo, magluwas lamang sa supermarkets, drug stores, post office kag ATM machines.
Hugot man ang pagpatuman sang social distancing sa diin napulo ka mga tawo lamang ang una nga ginapasulod sa mga supermarkets para magpamakal sang ila kinahanglanon kag may duha ka metros ang distansiya sa isa kag isa sang mga nagahulat sa ila sa guwa.
Samtang suno kay Cars may tatlo lamang ka tinutuyo nga ginapahanugutan sila nga makaguwa sang balay, una kun magapadulong sila sa mga supermarket para magpamalaklon sang pagkaon, magbakal sang bulong kag magpadulong sa ila nga trabaho.
