Luwas kag yara na sa estable nga kondisyon ang duha ka mga players nga napilasan sa ginpatigayon nga Bakbakan sa Capiztahan: 8th Boxing and Mixed Martial Arts Tournament sang Abril 14, 2026.
Ang mga contestants nagikan sa Passi City, Iloilo para sa Mixed Martial Arts kag sa banwa sang Ivisan, Capiz para sa boxing event.
Sa interview sang Bombo Radyo kay Mr. Jeffrey Paraiso, Provincial Director sang Federation of Bantay Bayan Western Visayas Inc., normal lamang ang kasubong nga insidente sa mga combat sports kag wala na ginpahanugutan nga maghampang liwat ang mga napilasan matapos nga nagpaidalom sa eksaminasyon sa Roxas Memorial Provincial Hospital.
Nahibaluan nga naglab-ot lamang sang mas ukon menos duha ka oras ang pagpabulong.
Sa pihak sang insidente, ginpabugal ni Paraiso nga nangin madinalag-on ang bug-os nga torneo.
Nagpasalamat man ang natungdan sa suporta sang gobyerno probinsyal sa paghatag sang bulig agud mangin madinalag-on ang nasambit nga kompetisyon.
Interviewed by Bombo Saira Joy Alu-ad Bautista | via Zona Libre
