Indi pa tapos ang hampang para sa mga players nga sanday Justine Baltazar, RJ Abarrientos, kag Troy Rosario matapos nga wala sila nalakip sa final 12 sang Gilas Pilipinas para sa hampang batok sa New Zealand sa second window sang FIBA world Cup Asian Qualifiers.
Apisar nga wala sila napilian sa lineup para sa nasambit nga hampang, mahimo nga malakip sa gihapon sila sa masunod nga hampang sang national team batok sa Australia bangud nalakip sila sa 18-man pool nga una nga ginpasa sang Samahang Basketbol ng Pilipinas sa FIBA antes ang 2nd window.
Nalakip man sa nasambit nga pool ang naturalized player nga sanday Ange Kouame, Jamie Malonzo, kag Kai Sotto apang wala nagpasakop sa training camp.
Gin-ako ni Head Coach Tim Cone nga indi mahapos ang pagpili sang final 12 players. Apang ginhatagan sini sang importansya nga ang mga wala nakasulod sa lineup ang nagapabilin nga kabahin sang programa kag mahimo liwat nga tawgon sa masunod nga hampang sang Gilas Pilipinas.
Matandaan nga sang Pebrero 26 napaslawan ang Gilas Pilipinas nga malutos ang team sang New Zealand sa ginhiwat nga hampang sa Mall of Asia Arena.
Masunod naman nga atubangon sang Gilas ang Australia sa dominggo sa amo man gihapon nga venue.
