Indi pa makabig nga “national security threat” ang mga Philippine Offshore Gaming Operation ukon POGO sa pungsod.
Ini ang ginpahayag ni National Security Council (NSC) Assistant Director General Francis Jude Lauengco.
Suno kay Lauengco, makabig pa lang nga “national concern” ang mga POGO bangud sa human trafficking, cyber-fraud, prostitusyon kag iban pa nga krimen.
Suportado sang NSC ang mga hagna nga may katuyuan nga dalayon nga ibawal ang POGO kag tanan nga internet gaming licenses sa bug-os nga pungsod.
Samtang, ginpamangkot ni Senator Sherwin Gatchalian ang NSC kun ano ang mga kinahanglanon nga makit-an sang ahensya antes matawag nga pagpamahog sa pungsudnon nga seguridad ang mga POGO.
Ginpunto man sang nasambit nga senador nga puro sindikato nga kriminal ang yara sa likod sang POGO.
May nadiskubrehan man suno diri nga military uniforms sang China kag may naaresto nga Chinese hacker nga konektado sa POGO.
