Mga ka-bombo, nagapati ka bala nga ang ng pagbasa indi lamang ang Liyabe sa ihibalo ukon kaalam, kundi amo man ang dalan padulong sa pagbag-o sang mga kabuhi.”
Sa kinaandan ang mga sentensyado nga priso mahimo makaguwa sa prisuhan kon matapos na nila ang ila sentensya kag ang iban ginapalip-ot ang pagtener sa prisuhan kon nagapakita sang maayo nga pamatasan.
Apang sa Brazil, may isa ka pinasahi nga programa kon diin ang mga priso makapalip-ot sang ila sentensya paagi sa pagbasa sang mga libro.
Sa idalom sang Remission for Reading Program, ang mga priso ginatugutan nga mabuhinan ang ila mga sentensya kon magbasa sila sang mga gin-aprubahan nga mga libro kag magpakita nga nahangpan nila ang kaundan sini.
Suno sa programa, ang kada libro nga mabasa katumbas sang apat ka adlaw nga pagbuhin sang sentensya. Kon makabasa ka sang tubtob sa 12 ka libro sa isa ka tuig, ang imo sentensya mahimo mabuhinan sang tubtob sa 48 ka adlaw.
Ang katuyuan sini indi lamang nga mapadasig ang ila kahilwayan kundi mahatagan man ang mga priso sang edukasyon kag mga oportunidad sa rehabilitasyon.
Pinaagi sini, ginalauman nga mas mangin handa ang mga priso sa pagbalik sa katilingban bilang mas responsable nga mga pumuluyo.
