ROXAS CITY – Nagalaom si Provincial Budget Officer Antonio Arbis nga mapapasar ang Annual Investment Plan (AIP) 2020 antes magtakop ang 90 diyas nga plaso sandig sa Local Government Code.
Suno kay Arbis, nga wala na sang iban nga pamaagi agud maaprubahan ini kundi ang pagsunod sang Provincial Development Council sa ginarekomendar sang SP nga sila ang mag-reconvene agud hinalaan ang ginapahayag nakita nga iregularidad sa ginaduso nga annual budget.
Ginpahayag sini nga kun indi maaprubahan ang annual budget para sa tuig 2020, wala sang mahimo ang gobyerno-probinsiyal kundi gamiton ang reenacted budget gikan sang tuig 2019.
Kun matabo ini suno sa iya, tuman ka limitado ang amo nga pondo kag may mga programa kag proyekto nga posible indi mapatuman.
Mahibaluan nga 1.7 bilyones pesos ang 2019 reenacted budget, mas manubo ini sa ginaduso nga AIP 2020 ang nagalab-ot sa 1.9 bilyones pesos.
Aminado man si Arbis nga sa sulod sang halos tatlo ka dekada niya nga pagtrabaho sa gobyerno-probinsiyal, subong gid lamang natabo nga naatrasar sang tuman ka lawig ang pagpapasar sang pondo sang lokal nga gobyerno sang Capiz.
Ginpahayag man ni Arbis nga mahitsu lamang ini kun matawhay nga mahinalaan sang legislative kag executive department kag ipaiway ang pamulitika.
Matandaan nga nag-apelar ang legislative department sa executive department kag sa gobernador sang probinsiya nga magre-convene ang (PDC) agud maamyendahan na ang (AIP) para sa tuig 2020.
Matandaan nga wala maaprubahan sang SP ang AIP matapos nga nakitaan sang duplikasyon sang pondo ang pila ka mga proyekto sa idalom sang 20% development fund.
