ROXAS CITY – Nagpatigayon sang picket rally ang mga miyembro sang magkatuhay nga progresibo nga grupo sa atubang sang Capiz Provincial Capitol agud ipanawagan ang pagdeklarar sang gobyerno-probinsiyal sang state of calamity sa Capiz bangud sa epekto sang tuman ka init nga panahon ukon dry spell sa mga ulumhan sa probinsiya.
Kalakip sa mga nag-upod sa amo nga aktibidad amo ang grupo nga Bayan-Capiz, Kahublagan sang mga Mangunguma sa Capiz (Kamaca), Tumandok, Gabriela kag iban pa.
Suno kay Joel Trinidad, ang provincial chairman sang Kamaca, halos tanan nga mga mangunguma sa probinsiya ang nalubog na sa utang bangud sa pagkapierdi sang ila tagsa ka mga ulumhan tuga sang nasambit nga kalamidad.
Apang sa pihak sang krisis sa karon nga nabatyagan sang mga mangunguma, wala sang may ginahimo nga solusyon ang gobyerno agud mabuligan ang mga naapektuhan sa sektor sang agrikultura.
Mahibaluan nga sa probinsiya sang Capiz, ang banwa pa lamang sang Tapaz ang nakadeklarar sang state of calamity.
Nahibaluan man sa Office of the Provincial Agriculturist nga indi sang supisyente ang mga naapektuhan sang nasambit nga kalamidad agud madeklarar ang state of calamity sa bilog nga probinsiya apang ginpasiguro nga may nagakaigo nga bulig ang gobyerno para sa apektado nga mga mangunguma.
