ROXAS CITY – Nagpatigayon sang hublag-protesta ang pila ka mga progresibo nga grupo sa Capiz sa Roxas City Public Plaza kadungan sang ika-34 ka tuig nga anibersaryo sang EDSA People Power Revolution.
Suno kay Angelo Orence sang Kahublagan sang mga Mangunguma sa Capiz (KAMACA), katuyuan sang amo nga lihok amo ang mapalab-ot sa gobyerno ang ginabakho nga problema sang mga pigado nga mga pumuluyo.
Suno diri madamo sang mga laye kag pagsulundan ang gobyerno nga nagapigos kag naga-upang sa pag-umwad sang kabuhi sang pila ka sektor sa sosyudad.
Kalakip sa ginapakamalaot sang mga progresibo nga grupo amo ang ginatawag sang mga ini ‘maduguon’ nga kampanya sang gobyerno kontra ilegal nga droga nga madamo na nga kabuhi ang nadula.
Wala man sang mga ini nauyunan ang proklamasyon sang pila ka mga kongresista nga naga-agaw sang soberaniya sang Pilipinas ang China.
Ginapakamalaut man sang mga ini ang kasubong pagpang-agaw sang mga dumuluong sa mga butang nga dapat para sa mga Filipino.
Kag ila man ginapanawagan sa gobyerno nga untaton na ang pagpatuman sang mga laye nga nagapigos sa sektor sang transportasyon kag mangunguma.
