ROXAS CITY – Posible sa masunod nga semana ipatawag na sang hepe sang Roxas City PNP ang mga pulis nga tag-iya sang mga sakayan nga nadakpan sang Philippine Coast Guard kag Maritime Police nga nagapatigayon sang iligal nga pangisda sa Isla sang Olutoyan.
Ini ang ginkumpirma ni Police Master Sergeant Ramil Arcangeles sang mainterview sang Bombo Radyo.
Suno kay Arcangeles nga nag-istorya na sila ni Police Lieutenant Colonel Ricardo Jumuad angut sa mga iligal nga aktibidad nga ginahimo sang iban nga mga pulis sa ila talatapan.
Partikular nga gintumod ang insedente nga naaktuhan ang sakayan nga ginapanag-iyahan sang mga pulis nga nagapatigayon sang iligal nga pangisda sa kalalawran.
Ginpahayag ni Arcangeles nga wala ginatolerar sang pamunuan sang PNP ang iligal nga buluhaton sang ila iban nga kaupdanan.
Samtang gindepensahan ni Arcangeles si Jumuad angut sa ginaalaegar pagpabaya sini sa iban nga personnel nga may kaangtanan sa iligal nga aktibidad.
Ginpahanumdum man ni Arcangeles ang mga pulis nga kun luyag mangin legal ang negosyo, magkuha sang permit agud hilway sila nga maka-operate.
