Ginpasidunggan sang Capiz Police Provincial Office (CPPO) ang mga pulis nga nangin successfull blood donors sang “Dugong Bombo” 2017 sang Bombo Radyo Philippines. Suno kay Capiz PPO provincial director PSSupt. Samuel Nacion nga masobra 20 ka mga pulis ang nakabaton sang pasidungog.
Ginpahayag pa sini nga nagakadapat nga kilalahon ang pagka-baganihan sang mga pulis paagi sa pag-donate sang ila dugo bangud madamo sang kabuhi ang ila mabuligan.
Suno pa sa iya nga mangin tuigan na nga aktibidad sang CPPO nga suportahan ang “Dugong Bombo” sang Bombo Radyo Philippines.
Gindugang pa ni Nacion nga tumalagsahon lamang ang kaangay sini nga programa nga may tinutuyo nga makabulig sa mga pumuluyo ilabi na ang mga nagakinahanglan sang dugo.
Suno pa sa opisyal nga pamaagi man ang paghatag sang pasidungog sa mga successful blood donors nga mga pulis agud maganyat ang iban pa nga magpakigbahin sa tuigan nga programa nga “Dugong Bombo” sang Bombo Radyo Philippines.
