ROXAS CITY – Nagapadayon sa karon ang maid-id nga monitoring sang Provincial Health Office sa mga Persons Under Investigation (PUI’s) kag Persons Under Monitoring (PUM’s) sa probinsiya sang Capiz bangud sa coronavirus disease (COVID-19).
Ini ang ginpahayag ni PHO-Public Information Office Ayr Altavas sang mainterview sang Bombo Radyo.
Suno kay Altavas, sandig sa ila pinakaulihi nga datos, nagalab-ot sa 1, 858 ang kabug-usan nga numero sang mga (PUM’s) sa Capiz bangud sang (COVID-19).
Sa nasambit nga numero 1, 777 diri ang padayon nga naga-self quarantine kag 81 naman ang natapos na sa 14-day quarantine period.
Nagapabilin naman sa 4 ang numero sang mga Persons Under Investigation (PUI’s) nga padayon pa nga nagapaidalom sa hospital quarantine samtang 2 naman ka PUI’s ang naga-home quarantine.
Ginpahayag sang opisyal nga nagsugod nga magdamo ang mga PUM’s sa Capiz kasunod sang pag-alabutan sang mga Capizeño gikan sa Metro Manila matapos nga ginpaidalom sa community quarantine ang amo nga lugar.
Bangud diri, nagpangabay si Altavas sa publiko nga mag-kooperar sa ila ilabi na ang mga indibidwal nga wala pa nagpakig-angut sa mga local health officials apang may history of travel sa mga lugar nga apektado sang COVID-19 agud gilayon sila nga mapaidalom sa quarantine.
