JAMINDAN, CAPIZ – Gintuad ni former Sangguniang Bayan Member Rudy Cusay nga ang mga pumuluyo ang nagtulod kag naghatag sa iya sang kabaskog nga magpadalagan sa pagka-alkalde sa banwa sang Jamindan.
Sa interview sang Bombo Radyo kay anay SB Member Cusay, nakit-an suno diri sang mga Jamindanganon ang iya malawig nga pagpanerbisyo kag dugang pa sini nga nagikan mismo sa baba sang pumuluyo nga ginapangita ang iya sinsero nga pagpangalagad.
Suno pa kay Cusay, magluwas nga bilang isa ka mangunguma, naagyan man sini sadto nga mangin tricycle driver rason nga kun hatagan sang kahigayunan nga makapungko bilang alkalde sang Jamindan, isa sa mga plataporma sini amu ang mapasanyag ang sektor sang agrikultura kag transportasyon.
Ginapasiguro man sini nga iya ihatag ang pagpanerbisyo nga patas nga amu ang ginapangita sa karon sang mga pumuluyo.
Mahibaluan nga nangin miyembro sang Sangguniang Bayan si Cusay sang tuig 1998 tubtob 2007 kun sa diin nagdaog ini sang 3 consecutive term.
Nagbalik ini liwat sa pagserbisyo bilang SB tuig 2016 tubtob 2019 kag liwat nga nagpadalagan sang tuig 2022 apang wala ini ginpalad.
Si Cusay ang magapapili bilang independent candidate sa palaabuton nga 2025 election.
