ROXAS CITY – Nagakahangawa sa karon ang mga pumuluyo sang Barangay San Jose, Roxas City sa posible malain nga epekto sa ila ikaayong lawas sang sanitary landfill sa ila nga lugar.
Sa segment nga Ipa-Bombo Ta! Ipa-Bombo Naton!, nagpalab-ot sang reklamo ang mga pumuluyo, partikular sa Sitio Guimba, sa amo nga barangay bangud sa halit nga tuga sang sanitary landfill sa ila.
Suno sa wala na ginhingadlan nga tagreklamo, duha na sini ka mga karabaw ang nagkalamatay matapos nga nakainom sang tubig sa sapa nga gina-iligan sang water waste gikan sa sanitary landfill.
Ginpahayag sini nga sigurado siya nga bangud sa higko gikan sa amo nga pasilidad rason nga napatay ang iya hinuptan nga karabaw bangud nagaisahanon lamang ang sapa sa ila lugar.
Suno diri nga sang nakaligad nga mga binulan, matin-aw pa ang tubig sa sapa apang sang amat-amat nga nagapuno ang sanitary landfill, nagsugod naman ini nga maglubog.
Sang ginpadulungan sang Bombo Radyo ang nasambit nga sapa, nakit-an man nga may mga basura sa panghigaron nga ginapatihan gikan sa sanitary landfill.
Bangud diri luyag sang mga pumuluyo sa lugar nga hatagan sang pagtamod sang gobyerno sang siyudad ang amo nga problema bangud tuman ini ka makatalagam para sa ikaayong lawas sang mga pumuluyo.
