ROXAS CITY – Nakamuklat kag nagahulag na ang mga pumuluyo batuk sa indi maayo nga buluhaton kag katuyuan sang mga katapu sang Communist Party of the Philippines-New People’s Army-National Democratic Front ukon CPP-NPA-NDF sa komunidad.
Ini ang nangin reaksyon ni Mr. Jeffrey Celiz kasunod sang naglapta nga mga streamers nga nagapakamalaut kag nagakundenar sa NPA sadtong Marso 29, 2021, ang adlaw nga natukod ang hublag.
Kumbinsido si Celiz, national coordinator sang Sambayan nga ginabug-usan sang mga anay lider sang NPA, mga KADRE kag anay operatiba sang NPA nga nakita na sang mga pumuluyo ang kahalitan nga natuga sang rebelde nga grupo sa komunidad kag ang pagkuha nila sang kalinungan nga madugay na kuntani nga naangkon sang Pilipinas.
Nangin alagyan ang facebook agud magpanawagan ang SAMBAYAN sang Marso 29, nga ila gintawag National day of Outrage and Condemnation nga sa baylo i-komemorar ukon selebrahon ang adlaw sa diin natukod ang NPA, dapat ini isikway kag kundenahon.
Ginpanindugan ni Celiz nga sila kag sang iya kaupdanan sa SAMBAYAN ang nagapangapin sa kalinungan kag nagabulig sa gobyerno agud maangkon ang kauswagan kag pagbag-o.
Suno diri nga ini pa lamang ang una nga tion nga ila nakita ang paghulag sang mga pumuluyo nga posible naghandum na sang malinong nga komunidad nga hilway sa kahadluk kag anuman nga sahi sang kalakasan ukon terorismo.
Nagpangabay ini sa tanan nga magbuligay kag suportahan ang gobyerno nga nagahimo sang tikang agud matapna ang terorismo nga dala sang CPP-NPA-NDF nga wala sang ginahimo kundi magsabwag sang kahadluk sa mga pumuluyo.
Nagapati si Celiz nga pinaagi sa pagpangisog kag pagpanindugan sang mga Pilipino, matapna ang terorismo nga tuga sang NPA.
Nahibaluan nga pila ka mga banwa sa probinsiya kasubong sang Cuartero, Maayon, Dumarao, Mambusao, Dumalag, Tapaz kag Sapian ang strategic area para sa mga negosyo nga makabulig sa ekonomiya sang Capiz, apang wala ginakadtuan sang mga investors sa pagkabalaka nga mapurnada ang ila negosyo bangud sa pagpang-ipit sang mga rebelde.
Samtang pabor si Celiz nga i-deklara nga persona non grata ang NPA agud ila mabatyagan nga wala na sang pumuluyo nga nagasuporta sa ila.
