ROXAS CITY – Pila na ka mga residente sang Panay Ville ang nagpadulong sa kapitolyo agud idangup ang ila problema nga pagpahalin sa ila sang munisipyo apisar nga may ara ini sang ginahawiran nga dokumento,
Sa interview sang Bombo Radyo kay Board Member Jonathan Sonny Besa nga indi magnubo sa kinse ka mga benepisyaryo ang nagapangayo sang bulig sa iya opisina.
Pahayag ni Besa nga agud maintirtenar ini kinaganglan nga magsumiter sang pormal nga reklamo sa Sangguniang Panlalawigan ang mga residente nga ginasaraduhan ang ila unit kag ginapahalin bangud ginapahayag nga peke ang ila mga dokumento nga ginauyatan,
Suno pa kay Besa nga indi insakto nga indi pagkilalahon sang present administration sa banwa sang Panay ang mga certificate of award nga ginauyatan sang mga pumuluyo apisar pa nga wala diri makita nga nakapirma ang anay alkalde nga si Felipe Barredo, kag ang anay administrador lang sang banwa ang nagcertify sini,
Wala man nakabutang sa ila ginapahamtang nga tarpulin kung anu ang nabayolar sang mga benepisyaryo, agud bawiun sa ila ang unit, kag dapat ginasunod lang nila ang guidelines sang National Housing Authority.
Sa tion nga makapadala na ang mga residente sang reklamo, mahimo nga ipatawag sang Sangguniang Panlalawigan ang LGU Panay, Capelco, Metro Roxas Water District, kag ang National Housing Authority.
Wala naman nagkumento si Besa kung may lakot nga pamulitika ang ginahimu sang munisipyo sa mga pumuluyo nga ginapahalin sa Panay Ville.
