DUMARAO, CAPIZ – Sa pihak sang mga palamangkutanon kun masarangan na bala ni Gley Hachuela nga tungdan ang responsibilidad sa pagka-bise alkalde sa ila banwa kun swertehon nga magdaog sa 2025 election, may mga pumuluyo nga nagapati sa kapasidad kag ikasarang sa bata sang ila Mayor nga mangin maayo nga opisyal kay makita diri ang dedikasyon sa hamdom nga magserbisyo.
Sa pahayag ni Nanay Carmen sang Barangay Bungsuan, Dumarao nga ila nakita ang batasan ni Gley sa kada pagbisita sini sa mga kabarangayan kag wala gid ini sang nabatian nga mga negatibo nga komento sa tion nga mag-atubang ini sa mga pumuluyo.
Dugang pa sini nga indi man si Gley pag-ibutang sang iya mga ginikanan sa kasubong nga sitwasyon kun indi pa ini preparado kag wala maintindihan ang iya pagasudlan nga pulitika.
Sa isyu naman nga wala ini sang eksperyensya sa pulitika pero magapadalagan na nga bise alkalde sa ila banwa, nagapati ini nga matun-an ini tanan ni Gley kag indi pagpabay-an sang iya amay nga magaalalay sa iya kag mga kaupod nga opisyal sang ila banwa.
Samtang, nagalaum sila nga mga pumuluyo sang Dumarao nga sa pag-tandem nila nga mag-amay sa palaabuton nga eleksyon ila mahatag ang mas maayo pagid nga pagserbisyo.
