CAPIZ-Nagbaton liwat sang tig-10 ka kilo nga bugas ang mga pumuluyo halin sa 10 ka barangay sa banwa sang Dao, Capiz, subong nga Oktubre 28, 2026, sa idalom sang inisyatibo sang Gobyerno Probinsyal sang Capiz nga ginpangunahan ni Governor Fredenil H. Castro, kaupod ang mga katapo sang Task Force Pagdumdum.
Ang pagpanagtag sang bugas amo na ang ikatlo nga hugna sang paghatag sang tig-10 ka kilo nga bugas sa mga benepisyaryo sa nasambit nga mga barangay.
Nalakip sa mga benepisyaryo ang mga pumuluyo sang Matagnop, Aganan, Mapulang Bato, Daplas, Ilas Sur, Ilas Norte, Agtanguay, Agtambi, Malonoy kag Centro.
Suno sa Gobyerno Probinsyal, ang inisyatibo nagatuyo nga makabulig sa mga pumuluyo nga naapektuhan sang nagapadayon nga krisis sa enerhiya, ilabi na sa pag-atubang sang ila adlaw-adlaw nga mga kinahanglanon.
Ginapakita man sang programa ang pagbinuligay sang Gobyerno Probinsyal sa pagpanguna ni Governor Castro kag sang mga katapo sang Task Force Pagdumdum, upod ang suporta ni Second District Representative Jane T. Castro, agud mahatagan sang bulig ang mga Capisnon nga nagaatubang sang kabudlayan.
