CAPIZ-Nagbaton sang ikatlo nga tag-10 ka kilo nga bugas ang mga pumuluyo sang apat ka barangay sa banwa sang Sapian, probinsya sang Capiz, sa libre nga distribusyon sang bugas sang Gobyerno Probinsyal sang Capiz.
Ginpangunahan ang distribusyon subong nga adlaw sa Barangay Agsilab, para sa mga benepisyaryo halin sa Barangay Agsilab, Agtatacay Sur, Agtatacay Norte kag Lonoy.
Ang nasambit nga bulig bahin sang ikatlo nga hugna sang distribusyon sang tag-10 ka kilo nga bugas para sa mga kwalipikado nga benepisyaryo sa apat ka barangay.
Lakip sa mga nakabaton sini ang mga miyembro sang Pantawid Pamilyang Pilipino Program ukon 4Ps, mga mangunguma kag mga mangingisda nga naapektuhan sang pagtaas sang presyo sang nagkalain-lain nga balaklon kag mga kinahanglanon.
Personal nga ginpangunahan ni Governor Fredenil H. Castro ang pagpalab-ot sang bulig, nga nangin kahigayunan man agud makighinun-anon sa mga pumuluyo kag mahibaluan ang ila kahimtangan.
Kaupod sang Gobyerno Probinsyal sa pagpatuman sang programa ang Provincial Social Welfare and Development Office ukon PSWDO kag ang Task Force Pagdumdum.
Pinaagi sa sini nga programa, ginatinguhaan sang administrasyon probinsyal nga mapalab-ot ang dugang nga bulig sa mga pamilya nga nagakinahanglan, ilabi na sa mga sektor nga naapektuhan sang nagataas nga presyo sang mga nagapanguna nga kinahanglanon.
