ROXAS CITY – May tagsa-tagsa ka pamaagi ang mga pumuluyo sang Barangay Punta Tabuc, Roxas City agud maamligan ang ila ikaayong-lawas batuk sa balatian nga dengue.
Ini ang nahibaluan kasunod sang ginpatigayon nga Bombo Patrol 101 sa Barangay sang Bombo Radyo.
Suno kay Tatay Junior sang Hermano Subdivision, ginatinguhaan nila nga matinluan ang ila palibot agud malikawan ang pagduging sang mga lamok ilabi pa sa karon nga maulanon ang paniempo.
Kun gab-i, nagagamit man sila sang mosquito spray kag mosquito coil ukon katol agud matabog ang mga lamok.
Suno naman kay Manong John sang Sitio Munay, dako nga problema sa ila lugar ang barado nga drainage system ilabi na kun mag-ulan.
Ginpahayag sini nga nagabun-od na ang likot sa drainage rason nga nagabaha sa tagsa ka magbubo ang mamunog ang ulan.
Ginpahayag naman ni Nanay Nenita nga dako ang iya pasalamat bangud wala pa sang miyembro sa ila pamilya nga nakaangkon sang balatian nga dengue.
Suno diri nga agud maamligan ang ila ikaayong-lawas, nagapaninlo sila sa ila palibot ilabi na sa mga lugar nga masami ginateniran sang mga lamok.
Samtang, wala nagapabaya ang konseho sang Barangay Punta Tabuc sa ila kampanya kontra sa balatian nga dengue.//
Ini naman ang ginpahayag ni Punong Barangay Nestor Buenviaje sang mainterview sang Bombo Radyo.//
Suno sa opisyal nga nagapadayon ang ila mga lihok agud maamligan ang ikaayong-lawas sang mga pumuluyo batuk sa amo nga balatian.
Ginpahayag sini nga ila ginatumod ang gina-estaran sang mga pumuluyo nga nakaangkon sang dengue agud mahibaluan ang mga lugar nga posible ginatumpukan sang lamok.
Padayon man sila sa pag-edukar sa pumuluyo pag-abot sa pagtinlo sa ila palibot kag pagguba sa mga breeding places ukon mahimo nga teniran sang lamok kapareho sang mga kanal kag mga butang nga may stagnant water.
Gindugang pa sang opisyal nga nagapatigayon man sila sang de-clogging agud indi magbara ang mga kanal sa barangay nga masami ginatunaan sang pagbaha sa tagsa ka magbubo ang mamunog nga ulan.
