ROXAS CITY – Kabulig karon sang mga kapulisan sa Capiz ang mga punerarya sa probinsiya sa ila nga ‘drive safely’ advocacy sa mga motorista.
Sa interview sang Bombo Radyo kay Police Master Sergeant Ramil Arcangeles, tagpamaba sang Roxas City Police Station, ginpahayag sini nga ang nasambit nga tikang ang konsepto mismo ni Capiz Police Provincial Office Director Police Colonel Julio Gustilo, Jr.
Suno diri, nagpakig-angut sila sa mga tag-iya sang funeral parlor sa probinsiya agud mangin kabulig sang hanay sang pulisya sa amo nga adbokasiya.
Magapahamtang sila sang mga signages sa pila ka mga strategic areas nga ginaagyan sang madamo nga mga motorista.
Sa nasambit nga signages, makit-an sang mga motorista ang mga tinaga nga ‘take good care of yourself or else, we will take care of you’ nga isa ka ‘friendly reminder’ gikan sa isa ka punerarya.
Ang statement nga kasubong may yara sang ‘double-meaning’ ang ginalauman sang mga kapulisan nga mangin dako nga bulig sa ila nga kampanya agud malikawan ang pagluntad sang mga aksidente sa dalanon.
