Wala sang pagpamalabag ang mga residente sang Sitio Tulay, Barangay Banica, Roxas City sa tion nga pahalinon ang mga ini bangud i-rehabilitate ang taytay.
Ginabanta 40 tubtob 50 ka mga panimalay ang maapektohan sa rehabilitation kag sa Barangay San Jose ang relocation site nga ihatag sa ila.
Sa interview sang Bombo Radyo kay Rizaldo Mingo, 64 anyos, iya ginpahayag nga nahangpan gid niya ang pagpahalin sa ila bangud gobyerno man ang nagapanag-iya sang duta nga ginatindogan sang mga balay.
Apang nagapangayo ini bulig kay Mayor Ronnie Dadivas nga kun mahimo mahatagan sila sang mas malapit nga relocation site bangud nagatrabaho ini bilang garbage collector sa barangay kag mabudlay kun malayo ang ila nga saylohan.
Samtang, ginabaton naman ni Mildred Obligar, 38 anyos, ang ila nga kapalaran nga pamilya nga magahalin sang ilistaran bangud ginatahod man sini ang desisyon sang gobyerno.
Apang kaangay sang iban nga residente, nagapangayo man ini bulig kay Mayor Dadivas nga kun mahimo masaylo sila sa malapit lang nga lugar bangud nagatrabaho ang iya bana sa Banica kag may mga kabataan pa nga naga-eskwela.
Nahibaluan nga nakahinun-anon naman ang mga pumuluyo sang Barangay nahanungod sa rehabilitation sang taytay nga pangunahan sang Department of Public Works and Highways kag posible umpisahan ini sa tunga-tunga sang tuig 2026.
