ROXAS CITY – Nagpalanuka, nagpalaminhod ang tiil, kamot, kag bibig, kag naglingin ang ulo, ini ang mga ginbatyag sang pila ka mga residente sang Barangay Poblacion, Pilar, Capiz matapos nakakaon sang panginhason partikular ang tahong.
Sa interview sang Bombo Radyo kay Mr. Mario Bartolome, amay sang tatlo kag lolo sang tatlo ka mga kabataan nga nauna nabalhag nga nabiktima sang food poinsoning, ginsiling sini nga ulihi nila nga ginkaon ang gindala sang iya isa ka bata nga green shells nga posible infected sang red tide.
Suno kay tatay Mario, alas-11 sang udto sila nagpanyaga sang Martes, Setyembre 20 pagkatapos kaon amat-amat na sila nakabatyag sang pagkalain sang pamatyag apang mas malala suno diri ang iya tatlo ka bata kag tatlo ka apo nga amu ang nakakaon sang madamo rason nga ila ini ginpadangat sa ospital sang gab-e sa amu man nga adlaw matapos indi na mahulag ang kamot kag tiil.
Isa naman sa bata ni tatay Mario ang nag-inom sang lana matapos nakabatyag kag didto siya nag-ayo, maayo naman ang pamatyag sang iya mga bata kag apo nga naospital kag natalana nga makaguwa sa ospital sa Dominggo.
Nakabatyag man sang kapareho nga sintomas ang 13-anyos nga residente sang nasambit nga Barangay sang nagkaon sang kapin 20 ka bilog nga tahong, gilayon siya nga ginpainom sang gata kag ginpakaon sang muscovado nga asukar sang iya iloy kag didto niya ginsuka ang iya kinaon kag nag-ayo ang pamatyag.
Suno naman kay Mr. Johnrey Patricio, mangingisda kag isa sa na food poison, ginpahayag niya nga bug-os sang iya pamilya ang nakabatyag sang nasambit nga sintomas matapos nakakaon man sang tahong gab-e sang Setyembre 22, kun sa diin pareho niya nga ginkuhaan sang panginhason ang ginkuhaan man sang bata ni tatay Mario.
Dugang pa ni Patricio nga sa iya pagpadulong sa lawod wala man sini nakita nga nagapula ang kadagatan.
Sa pihak sini, nag-ayo man ang pamatyag sang iya pamilya matapos nagkaon sang muscovado nga asukar kag unod sang lahin nga lubi.
Matapos sang asud-asod nga insidente, ginkumpiskar ang mga panginhason sang ila Barangay, gani nagaproblema si Patricio amu man ang iya kaupdanan sa pagpangisda bangud gindumilian sila nga magpalawod nga amu ang ila pangabuy-anan agud may ipakaon sa ila pamilya.
Nagapangayo ini sila sang bulig sa gobyerno nga kuntani buligan sila kag mahatagan sang ayuda.
