ROXAS CITY – Ginpanindugan sang local government unit sang Panay nga peke ang mga dokumento nga ginarepresentar sang mga residente nga naga-istar sa housing unit sa Panay ville.
Ini ang ginpahayag ni Mr. Jessie Baes Municipal Planning Officer sang local government Unit sang banwa sang Panay sang mainterview sang Bombo Radyo.
Suno kay Baes wala nila ginakilala ang mga dokumento nga ginapakita sa ila sang mga residente bangud indi ini pirmado sang ila anay alkalde bilang pamatuod nga ini isa ka legal nga dokemento.
Mahibaluan nga base sa ila record natukiban nga wala sang mga pangalan ang naga-istar sa amu nga housing unit sa National Housing Authority, buot silingon wala ang mga ini nag-agi sa intsakto nga proseso.
Ginpahayag pa ni Baes nga suno sa NHA, naga-agi sa maid-id nga proseso ang tanan nga mga benepisyaryo sang amu nga housing units.
Pagklaro sini nga ang ila ginahimo nga tikang wala sang lakot nga pagpamulitika bangud gina-obra lamang nila kung anu ang instakto kag ang ila obligasyon.
Sa pihak nga bahin, gin-klaro man ni Baes nga ang mga unit nga bawiun sang lgu ang pagapaistaran sa mga pumuluyo sang Barangay Cabugao, Oeste ang iga-relocate kay sila ang maapektuhan sang igatukod nga slaughter house nga proyekto sang munisipyo.
Samtang nagapadayon pa suno kay Baes ang ila ginahimo nga validation sa Panay Ville kung legal gid man nga tag-iya ang nagaistar diri, matapos nga nabalahuba ang talamak nga baligyaanay sang unit sa housing area.
