ROXAS CITY – Dismayado ang pila ka mga residente malapit sa Maayon Public Cemetery matapos nga ginaalegar ginpabay-an sang duha ka oras nga wala malubong ang isa ka COVID-19 positive nga napatay sa nasambit nga banwa.
Sa interview sang Bombo Radyo Roxas sa wala na ginhingadlan nga tagreklamo nga sang tinalikdan nga Domingo sang hapon gindul-ong sang salakyan sang Joel’s Funeral Homes sa Maayon Public Cemetery ang bangkay sang isa ka babayi nga ginbawian sang kabuhi gikan sa isa ka pribado nga ospital kag ginkabig nga COVID-19 Positive.
Dugang pa sini nga matapos nga ipanaog ang bangkay sa amo nga salakyan, gilayon ini nga gintunod sa buho nga ginkutkutan apang wala naman ini gintambakan.
Mahibaluan nga wala sang may nag-asister nga katapo sang Maayon Emergency Response Team (MERT) sa paglubong sa tion nga ginlubong ang napatay nga pasyente.
Ginpahayag sang tagreklamo nga kun wala pa sang may nagtawag kay Mayor Raymond Malapajao, wala pa natigayon matambakan ang buho nga ginkutkut nga nagpabilin nga nakatiwang-wang sa sulod sang duha ka oras.
Ginapatihan nga wala sang may natabo nga koordinasyon sa tunga sang mga Barangay Officials, katapo sang Maayon MDRRMO kag mga empleyado sang nasambit nga punerarya.
