PANITAN, CAPIZ – Nagawangal ang pila ka mga residente sa banwa sang Panitan bangud sa mahinay nga pag-release sang medical clearance ukon health certification sang Panitan Rural Health Center.
Mahibaluan nga nagdugok ang mga tawo sa nasambit nga talatapan agud makakuha sang amo nga dokumento nga ila gamiton para makasulod sa siyudad sang Roxas.
Ginpahayag ni Manang Joy, indi nila ma-intiendihan ang pabag-o bag-o nga pagsulundan ilabi na ang mga pagbag-o sa mga rekisitos nga ginapangita agud mahatagan sila sang health certificate.
Suno sa iya nga una nga ginapangayo sa ila amo ang barangay clearance kag valid ID apang sa karon, gindugangan pa sang certificate of employment ang requirements.
Dako nga palamangkutanon ini sa iya bahin bangud suno sa ginang, wala man siya sang trabaho kag luyag lamang makapadulong sa siyudad sang Roxas agud maka-withdraw kag makabakal sang bulong sang iya iloy.
Suno naman kay Manang Inday, nagalain ang ila buot bangud sa mga pagsulundan nga ginapatuman nga suno sa iya, nagapigos sa ila nga mga pigado.
Ginpahayag sini nga indi man sila mapatay sa coronavirus disease (COVID-19) apang posible mapatay sila sa gutom bangud apektado ang ila nga palangabuhian sa sini nga mga pagsulundan.
Suno sa iya nga tatlo ka adlaw na siya nga nagabalik-balik sa nasambit nga talatapan para lamang makakuha sang health certificate.
Suno sa iya nga ginapangitaan pa sila sang permit gikan sa Roxas City nga suno diri imposible nila nga mahatag bangud indi man sila makalusot sa siyudad.
