BORACAY ISLAND — Ginahinyo sang pila ka mga residente sa isla sang Boracay nga mapalawig pa ang cash for work program sang Department of Labor and Employment ukon DOLE.
Sa interview sang Bombo Radyo sa isa sa mga residente sa isla nga si Ginang Maribel, anay nagatrabaho sa isa ka shop nga nagsarado na sang ginsuguran ang Boracay closure, nga kulang ang iya nga ginakita nga P323.50 kada araw agud masabat ang pang adlaw adlaw nga kinahanglanon sang iya pamilya.
Suno pa sa ginang nga nagakaigo lamang ang ila nga natipon sang iya mister tobtob
Sa masunod nga tatlo ukon apat ka bulan apang ginaproblema sini sa karon kun diin sila magakuha sang dugang nga gamiton sa maabot nga mga binulan labi na nga may tatlo sila ka mga kabataan.
Nahibaluan nga ginmandu ni President Rodrigo Duterte pinaagi sa Presidential Proclamation No. 475 ang anum ka bulan nga pagpasarado sa Isla agud mapaidalum sa rehabilitasyon.
Gindugang pa ni Ginang Maribel nga plano sang iya nga mister nga magpasimpalad na lamang sa Manila sa masunod nga bulan agud magpangita sang trabaho sa tion nga indi na pagpalawigon pa sang DOLE ang ila nga programa.
Sa karon may mas o menus sa 2,000 ang mga displaced workers sa isla sang Boracay ang magatrabaho sa sulod sang isa ka bulan sa idalum sang cash for work program kag magabaton sang minimum wage.
Nahibaluan nga sila nga mga trabahador sa karon ang masaku sa pagpaninlo sa kilid sang baybayon sa nasambit nga isla.
