ROXAS CITY– Gin-alerto sang Provincial Disaster Risk Reduction and Management Office (PDRRMO)- Capiz ang mga residente nga naga-estar sa kabukiran sa Barangay Agbatuan, Dumarao, Capiz.
Sa interview kay PDRRMO- Capiz action officer Esperidion Pelaez, ginpahayag sini nga padayon ang ila nga pagbantay sa kondisyon sang duta sa bukid bangud sa posible nga pagkatiphag sini anuman nga oras.
Suno pa kay Pelaez nga posible nga maglala pa ang sitwasyon sa lugar kun indi mag-untat ang ulan sa probinsiya lalawigan.
Kaangut sini, pila ka mga residente na ang una nga gin-evacuate kasunod sang paghulag sang sensor nga ginpahamtang sa duta sang Philippine Volcanology and Seismology (PHIVOLCS) sa diin yara karon sa Alert Level 3 ang nasambit nga barangay.
Nahibaluan nga temporaryo nga gin-evacuate ang mga pumuluyo sa isa ka eskwelahan sa nasambit nga lugar kag pila naman ka mga residente ang nagtenir sa ila mga himata.
Samtang, nagapabilin nga ginabaha ang 70 ka mga barangay sa probinsiya.
Ba-se sa report sang PDRRMO may pila ka mga barangay roads sa gihapon ang indi maagyan sang anuman nga sahi sang salakyan bangud sa mataas nga lebel sang tubig sa mga karsada.
