ROXAS CITY – Mayorya sa mga pumuluyo sa Barangay Inzo Arnaldo Village, sining syudad ang pabor sa ginpapanaug nga 2 months preventive suspension kay Punong barangay Einstein Okpora sang Sangguniang Panlungsod bangud sa reklamo nga simple misconduct.
Sa pagpadulong sang Bombo News team sa Mejorada Subdivision, Barangay Inzo Arnaldo Village, naghatag sang ila reaksyon ang mga residente angut sa nasambit nga isyu.
Suno kay alyas Jose nga pabor ini sa nangin desisyon sang Sangguniang Panlungsod kag nagakadapat lamang ang ginhimo nga pagpanaug sa pwesto ni Okpora bilang pagsunod sa laye.
Nagpangabay lamang ini sa mga opisyales sang ila barangay nga ipaiway ang ila personal nga away kag hatagan atensyon ang kinahanglanon sang mga pumuluyo, labi na karon nga nagapangatubang sa krisis ang bilog nga kalibutan bangud sa coronavirus disease 2019.
Wala man ini sang masaway kay Okpora bilang barangay kapitan bangud maayo man ang pagpanerbisyo sini sa mga pumuluyo.
Samtang suno naman kay Fernando Paclibar nga pabor siya sa preventive suspension nga ginpapanaug kay Okpora bangud indi man ini maduktan kun wala sang ginlapas nga pagsulundan.
Komento ni Paclibar nga bisan diin tan-awon may kasal-anan nga nahimo si Okpora bangud ginpasilabtan sini ang pondo sang SK sa pihak sang pagpamatuk sang mga kabataan.
Ginbali man sini ang pahayag ni Okpora nga political harassment ang natabo bangud nag-agi ini sa maid-id nga deliberasyon sang mga city councilors kag may due process antes ginpaguwa ang rekomendasyon nga 2 months preventive suspension.
Para pa kay Paclibar nga nagapakita man nga guilty si Okpora sang nagpanaug ini sa pwesto.
Wala man nalikawan sang mister nga magkomento nga mahina ang asenso sang ila barangay sa pagdumala ni Okpora.
Samtang nagpangabay man ini sa iban nga mga residente nga hatagan sang tsansa ang nagapungko karon nga punong barangay nga si 1st barangay kagawad Ervin Sicad nga mapakita ang iya ikasangkol nga dumalahan ang ila barangay.
