SIGMA, CAPIZ – Dismayado ang mga residente sang Sitio Katamnan, Barangay Parian Sigma, Capiz bangud sa padayon nga quarry operation sa ila lugar.
Sa pagbisita sang Bombo Radyo News Team sa lugar nagpalab-ot sang reklamo ang mga residente sang ila nga madugay na nga problema sa diin makapila na ka-beses sila nagareklamo sa ila mga barangay officials sa pagpamuno ni Punong Barangay Melvin Caporal.
Suno sa isa ka residente, naalarma sila bangud sa pagkakalbo sang bukid kun sa diin sa tagsa ka mag-ulan, naga-ilig ang tubig nga may dala nga lapok kag bato gikan sa quarry site kag nagabulhog ang tubig sa ila panimalay.
Magluwas diri, apektado man ang suba sa lugar kun sa diin sila nagakuha sang ginagamit nga tubig bangud sang kemikal gikan sa quarry site.
Kapin sa 20 tubtob 30 ka mga panimalay ang apektado sa diin ang iban sa ila naghalin na sa ila panimalay bangud man sa peligro nga matuga sini sa ila.
Matandaan nga temporaryo ginpauntat sang Capiz Provincial Environment and Natural Resources Office (CAPENRO) sang damlag lang ang quarry operation sa lugar bangud man sa pila ka mga bayolasyon.
Mahibaluan nga barangay resolution lamang ang ginsumiter sang quarry operator nga si Ramonito Laab sa ila talatapan nga pirmado man sang mga barangay officials.
Apang kasunod sang ginhimo nga imbestigasyon sang CAPENRO sa nasambit nga lugar bangud man sang reklamo sang mga pumuluyo, didto natukiban nga may yara sang nangin bayolasyon sa Environmental Compliance Certificate (ECC) ang nasambit nga quarry operation bangud wala ini sang siltation pond.
Matandaan nga nag-issue naman si Governor Esteban Evan “Nonoy” Contreras sang cease and desist order pinaagi sa (CAPENRO) agud mapauntat na ang nasambit nga operasyon apang wala man sila sa gihapon nagasunod.
Samtang, nagalaum naman ang mga residente nga gilayon ini maaksyunan kag matigayon nga mapauntat ang illegal quarry operation sa nasambit nga lugar.
