ROXAS CITY – Temporaryo nga gindumilian ang mga residente sang Barangay Cubay, President Roxas, Capiz nga magpadulong sa kaiping nga kabaranggayan sa ila banwa.
Ini ang ginkompirmar ni Mayor Receliste ‘Tanoy’ Escolin sang mainterview sang Bombo Radyo.
Bangud ini sang nagapadayon nga contact-tracing sa mga nakahalubilo sang 34 anyos nga locally-stranded individual (LSI) nga kalakip sa 10 ka mga panibag-o nga nagpositibo sa coronavirus disease (COVID-19) sa probinsiya.
May kapin 20 ka mga persona na suno sa alkalde ang ila nalab-ot nga may direct contact sa amo nga persona kag ipaidalom sa rapid test.
Kun matapos na ang contact-tracing suno sa alkalde, mahimo naman nga pahanugutan ang mga residente sang nasambit nga barangay nga makapadulong sa kaiping nga mga kabaranggayan.
Suno sa alkalde nga sadtong Hunyo 28 nag-abot sa ila banwa ang nasambit nga ginang kag ginkonsiderar ini nga mag-strict home quarantine lamang bangud may yara ini sang lapsag.
Una ini nga nag-negatibo sa rapid test apang ginkuhaan pagid sang swab specimen para sa real-time polymerase chain reaction (RT-PCR) test bangud naghalin ini sa Quezon City nga ginakabig nga tuman nga apektado sang amo nga balatian.
Kasunod sang pagpositibo sang nasambit nga pasyente, gilayon ini nga ginpadulungan sa ila balay kag gindala sa Roxas Memorial Provincial Hospital.
Wala naman ginapaguwa ang mga kaupod sini sa balay kalakip ang iya apat ka mga kabataan kag bana kag ginadul-ungan na lamang sang suplay sang pagkaon sang lokal nga gobyerno sang banwa samtang ginahulat ang resulta sang ila rapid tests.
