ROXAS CITY – Makabig nga organisado nga grupo nga nagasuporta kay outgoing US President Donald Trump ang nagtipon sa Capitol sang Texas sang damlag lang.
Ginpahayag ni Bombo International News Correspondent Remuel Dupit, isa ka Capizeño nga nagatrabaho kag nagapuyo sa McKinney, Texas nga kapin sa 20 ka mga indibidwal ang nagtipon sa Capitol sang Texas pila ka adlaw antes ang inagurasyon ni US President-elect Joe Biden.
Ba-se sa nakuha nga impormasyon ni Dupit nga katuyuan sang mga pro-Trump supporters nga maprotektahan ang kapitolyo pananglitan may mga grupo nga magtuga sang kalakasan.
Sa nasambit nga numero sang mga nagtipon nga indibidwal, 2-3 diri ang nagadala sang armas.
Preparado man ang militar pananglitan nga mangin bayolente ang mga protesters suno kay Dupit sa diin nagpahamtang na sang barikada ang militar kag armado sila sang matag-as nga kalibre sang armas.
Ginkumpirma man sini nga nabalaka ang mga residente sang Texas nga sa pagpungko ni Biden liwat ini magapatuman sang lockdown.
Nahibaluan nga matunog karon ang mga estorya nga target ni Biden sa pagsulod sang bag-o nga administrasyon ang pagpaidalum sa lockdown sa Texas nga hugot nga ginapamalabagan sang mga pumuluyo.
Samtang ginakulang na karon ang hospital beds para sa mga covid patients sa nagkalain lain nga ospital sa Texas bangud sa padayon nga pagtaas sang kaso sang COVID-19.
