ROXAS CITY – Gin-athag sang Punong Barangay sang Barangay Cagay sining syudad nga wala sang may ginpili ang mga barangay officials sa mga nalakip sa listahan sa makabaton sang Social Amelioration Package sang Department of Social Welfare and Development (DSWD).
Kasunod ini sang ginpalab-ot nga reklamo sang pila ka mga pumuluyo sa Bombo Radyo nga wala malakip sa listahan sang makabaton sang amo nga ayuda.
Ginpahayag ni Punong Barangay Arthur Aragon Sr. nga 1,345 tanan ka mga pamilya ang ginlista kag ginsumiter sang mga barangay officials sa City Social Welfare and Development Office nga makabaton sang nasambit nga bulig-pinansiyal apang ini tanan ang nag-agi sa maid-id nga balidasyon sandig sa guidelines sang CSWDO.
Suno sa opisyal nga wala malakip sa listahan ang mga manggaranon, mga manunudlo, naga-trabaho sa gobyerno nga dako ang sweldo kag pamilya nga naga sweldo sang P7, 000 pataas sandig sa guidelines sang CSWDO.
Gindugang pa ni Aragon nga wala sang lamud-pamulitika ang ila pagpili sa mga mga nalakip sa listahan kag ginpanindugan nga nag-agi sa maid-id nga balidasyon sandig sa pagsulundan sang ahensiya.
