ROXAS CITY – Nakahanda na ang mga response units kag equipments nga pagagamiton pananglitan maga-evacuate ang pila ka mga residente bangud sa ginakabalak-an nga mangin epekto sang bagyo nga Ursula sa probinsiya sang Capiz.
Ini ang ginpahayag ni Provincial Disaster Risk Reduction and Management Office (PDRRMO) Capiz Head Judy Grace Pelaez sang mainterview sang Bombo Radyo.
Mahibaluan nga ginpaidalom na sa tropical cyclone signal number 2 ang probinsiya bangud sa nasambit nga bagyo.
Suno kay Pelaez, hugot sa karon ang kooperasyon sang magkatuhay nga ahensiya sang gobyerno kapareho sang Philippine National Police, Bureau of Fire Protection, Department of Social Welfare and Development Office (DSWD), Philippine Red Cross, mga local government units (LGU’s) nga nakahanda nga magresponde sa oras nga kinahanglanon.
Nagapabilin naman nga kanselado ang biyahe sang tanan nga sahi sang sakayan-pandagat kag barko sa mga pantalan sa siyudad sang Roxas base sa abiso sang Philippine Coast Guard (PCG).
