ROXAS CITY – Nagapanindugan ang isa ka Returning Overseas Filipino (ROF) nga naka-facility quarantine sa Hortus Botanicus sa Barangay Milibili, Roxas City nga wala sila sang bayolasyon sa house rules sa amo nga pasilidad.
Kasunod ini sang pagpaguwa sang statement ni City Mayor Ronnie Dadivas kag City Health Office Dr. Lory Cahilog natuhoy sa ginapahayag bayolasyon sang pila ka mga ROF’s sa amo nga pasilidad nga ginaalegar nagbato sa mga frontliners nga na-designar diri.
Suno sa wala na ginhingadlan nga ROF, wala lamang mapunggan sang iban sini nga kaupdanan nga magpautwas sang ila pagkadismaya sa mga frontliners nga nagbisita sa amo nga pasilidad bangud wala ginaaksiyunan ang ila ginapalab-ot nga problema.
Gindugang pa sini nga ila man ginkalain sang buot ang kasubong indi maayo nga pagsabat sa ila sang mga frontliners.
Una diri, may mga ROF’s suno diri nga wala gihapon makuhaan sang swab specimen para ipaidalom sa real-time polymerase chain reaction (RT-PCR) test.
May yara man nga natapos na ang 14-day quarantine period apang wala gihapon nagaabot ang resulta sang ila laboratory tests.
Ginareklamo man sang mga ini ang kasubong gintipid nga pagkaon nga ginahatag sa ila adlaw-adlaw.
May yara man kuntani sila nga pamilya nga magadul-ong sang pagkaon apang wala man ini ginapahanugutan.
Nagalain ang ila buot suno diri bangud kasubong may diskriminasyon sa ila nga mga OFW’s bangud kasubong nga sila gid ang ginadudahan nga posible positibo sa COVID-19 apisar nga nangin maid-id na nga proseso ang ila naagyan antes makapauli sa probinsiya.
