Nagakabalaka ang mga rice retailers sa syudad sang Roxas ang posibilidad nga ipatuman liwat sang gobyerno ang P50 per kilo price cap sa imported rice, bangud dako ang kapierdihan sa ila trabaho.
Sa interview sang Bombo Radyo kay Edilberto Cambe, president sang Roxas City Rice Retailers Association, iya ginpahayag nga mangin mabudlay para sa mga rice retailers nga magsunod sa kaangay nga presyo bangud mataas ang gasto sa ila pagbakal sang imported rice gikan sa ila suppliers.
Kun P50 kada kilo ang ipilit bisan pa nga mas mataas ang ila investment, halos wala na sila sang makuha kag posible nga mapierde pa ang ila negosyo.
Suno kay Cambe, importante nga tun-an sang maayo sang gobyerno ang karon nga sitwasyon sang ekonomiya antes magpatuman liwat sang price cap bangud padayon man nga nagataas ang presyo sang nagkalain-lain nga basic goods, lakip na ang gasto sa transportasyon, operasyon, kag iban pa nga galastuhan sang mga negosyante.
Madumduman nga sang Mayo 13, 2026, nagpirma si Presidente Ferdinand Marcos Jr. Executive Order No.118 nga nagpatuman sang P50 kada kilo nga price cap sa imported rice sa bug-os nga pungsod.
Katuyuan sang sini nga mando nga matapna ang indi makatarungan nga pagtaas sang presyo sang imported nga bugas, malikawan ang pag-abuso sa merkado, kag masiguro nga may nagakaigo kag barato nga suplay sang bugas para sa publiko sa tunga sang pagtaas sang presyo sang pagkaon tuga sang krisis sa Middle East.
Sa pihak sini, nagalaum ang natungdan nga antes ipatuman liwat ang price cap, may mas malapad nga konsultasyon ang gobyerno sa mga rice retailers, importers, kag iban pa nga apektado nga sektor.
