ROXAS CITY – Indi matapos ang pagpasalamat sang mga evacuees nga yara sa evacuation centers sa Batangas sa Brotherhood of Capiz Riders nga personal nagpanagtag sang mga face mask sa mga apektado nga mga residente sang bulkan Taal.
Suno kay Pastor Russell Monton Ban, founder sang Brotherhood of Capiz Riders pinaagi sa ila nga proyekto nga gintawag ‘’Miracle of 37,000’’, nalampuwasan pa nila ang ila nga target nga maka-donate sang 37,000 nga face mask, sa diin naglab-ot sa 62,000 nga face mask ang ila nga nahatag sa mga evacuees.
Nahibaluan nga walo ka evacuation centers sa Batangas ang napadulungan kag nahatagan sang grupo sang mga riders sang face masks nga nagapanguna nga kinahanglanon sang mga evacuees, magluwas sa canned goods, diapers sa mga bata, habol, ulunan kag banig.
Kasubong nga ginakumos ang tagipusoon sang mga riders sang makita ang sitwasyon sang mga evacuees, nga iban ang nagagamit sang karton bilang ila nga hiligdaan.
Samtang gindayaw sang gobernador sang Batangas ang grupo, bangud nagbiyahe pa ini gikan sa Visayas para lamang makadul-ong sang bulig.
Nagpanawagan man sang dugang nga bulig si Ban sa publiko para mabuligan nga makabangon ang mga apektado nga residente sang Batangas kag Cavite.
Nahibaluan nga pinakauna ang Brotherhood of Capiz Riders sa mga grupo sa guha sang Luzon area nga naghatag sang bulig sa mga evacuees nga apektado sang pag-alburoto sang bulkan Taal.
