ROXAS CITY – Nagdangop sa Bombo Radyo ang isa ka concerned citizen agud i-reklamo ang ila punong barangay sa Barangay Sta. Cruz, Ivisan, Capiz nga ginaalegar ginpang-ibanan sang P1, 000 ang ila nga P6, 000 nga ayuda nga nabaton sa idalom sang Social Amelioration Program (SAP) sang Department of Social Welfare and Development Office (DSWD).
Suno sa wala na ginhingadlan nga persona, ginpahayag sini nga nakibot sila sang adlaw na mismo sa pag-release sang ayuda sang ginpasulod ang mga benepisyaryo sa barangay hall kag ginpangkuhaan sang P1, 000 sa ila nabaton nga kwarta.
Ginhambalan lamang sila sa amo man mismo nga adlaw sang mga barangay kagawad bangud ini suno diri ang nangin mandu ni Punong Barangay Nicasio Ralph ‘Bubot’ Muñoz.
Sa ila pagpangusisa, ila nahibaluan nga ang ginpangkuha nga tag-P1, 000 sa kada benepisyaryo ang igahatag sa mga wala makaambit sang nasambit nga bulig-pinansiyal.
Kun sumahon suno diri, nagalab-ot sa halos P300, 000 ang nakolekta sang ila mga barangay officials bangud may yara sang mas o menus 300 ka mga SAP beneficiaries sa ila nga barangay.
Nagapabilin naman nga bukas ang talatapan sang Bombo Radyo para makasabat sa amo nga isyu ni Muñez.
