Isa ka maayo ngabalita para sa mga matamad sa pagpang-tootbrus sang ila mga ngipon ukon may mga kasablagan sa lawas pagkatapos nga ginpakilala sang mga Japanese scientist ang “g.eN”, ang una nga “oral care robot” sa kalibutan nga makatinlo sang imo mga ngipon nga indi na kinahanglan nga maghulag sang imo mga kamot.
Gamit ang teknolohiya nga ginhimo sang Waseda University Robotics Laboratory, ining high-tech nga gamit nagapanghikot paagi lamang sa pagkagat sa mouthpiece, sa diin ang magagmay apang gamhanan nga mga brush sini authomatic nga nagahulag pataas, paidalom, kag wala kag tuo sa pagtinlo sang duha ka kilid sang imo mga ngipon sang dungan sa sulod lamang sang isa ka minuto.
Napamatud-an sang isa ka research paper nga ginsumiter sa Japan Society of Healthcare Dentistry nga epektibo ang g.eN, nga nagarekord sang plaque retention rate nga 22.4%, isa ka lebel nga sulod sa pagsulundan sang “good oral hygiene” kag katumbas ukon nagasobra sa pagkaepektibo sang tradisyonal nga pagpang-tootbrush.
Ang robot nagabug-at sang 220 grams, may USB Type-C charging, kag may apat ka operating modes pareho sang “Easy,” “Careful,” “Special Care,” kag “Children” agud madugangan ang mga kinahanglanon sang nagkalainlain nga mga user.
Apisar nga ang g.eN isa ka original design sa pagbulig sang mga tawo nga may limitado nga paghulag, nangin popular man ini sa publiko nga nagapangita sang mas madasig kag mas komportable nga paagi sa paghupot sang ila mga ngipon nga matinlo nga wala sang pagpangabudlay.
