ROXAS CITY – Nagdangop sa Bombo Radyo ang pila ka mga senior citizen naggikan sa banwa sang Panitan agud ireklamo ang wala pa sa gihapon mahatag sa ila nga social pension sang Department of Social Welfare and Development para sa tuig-2019.
Suno sa isa sa mga tagreklamo nga wala na nagpalayag sang pangalan para sa iya seguridad, katapusan sila nga nakakuha sang social pension sa munisipyo sadtong nagligad pa nga Disyembre 2018.
Gindugang pa sini nga ginpasaligan sila sang Municipal Social Welfare and Development Office nga mabaton nila ang ila social pension sa una nga semana sang Disyembre 2019 apang wala man ini mag-abot sa ila.
Nagalab-ot na sa P6,000 ang ila kuluhaon nga social pension naggikan sa DSWD nga amo ang kabug-osan nga kantidad nga natalana kuntani nila mabaton para sa tuig-2019.
Mahibaluan nga P500 ang bulanan nga social pension sang mga senior citizen.
