BARANGAY DUMULOG, ROXAS CITY – “Mapatay ka lang, indi ka gid madala sa listahan samtang ako ang nagapungko nga OSCA President sa atun barangay”.
Ini nga mga tinaga ang nagtatak kag nagtulod kay tatay Leodegario Agana, 76-anyos agud ireklamo ang OSCA President sang ila barangay nga si Reynaldo Martinez matapos ginbalibaran ang ginasukot sini nga P500 kabaylo nga ilakip ini sa listahan sang mga pensioner.
Sa interview sang Bombo Radyo kay tatay Leodegario, ginpahayag sini nga wala siya sang subong sini ka dako nga kantidad kag sa pagkamatuod suno diri naga-umang ini sang inugbakal sang iya pagkaon kag galamiton sa adlaw-adlaw.
Mahibaluan nga magluwas sa P20.00 nga ila ginabayad kada tuig nagahirit pa si Martinez nga kinahanglan maghatag sa iya sang tig-P500.00 sa tion nga magpalista kag magrelease sang pension ang mga katigulangan.
Butang nga ginkwestyon sang kadam-an kag kapin 50 nga mga senior citizen ang nagpirma kag nagkasugot nga pahalinon na lamang ini sa pwesto.
Sa separado pa nga pahayag sang iban nga mga katigulangan daw kaangay nga indi sang patas ang pagdumala ni Martinez bangud kalabanan nga mga yara sa listahan sini lunsay iya mga himata kag ang malain pa ang iban doble na ang ginabaton nga mga pension.
Bangud sini, dako ang ila paglaum nga gilayon mahatagan sang klaruhan kag sabat ang ila mga ginareklamo batuk sa ila OSCA President.
