Bombo Sunnie kun may Competition nga kutkutanay sang duta nga matabo diri sa Roxas City, maintra ka man? Kapin pa kun ang venue sa patyo?
Bangud didto sa isa ka pungsod Liwat nga nagtililipon ang mga sepulturero gikan sa bug-os nga kalibutan sa Hungary agud magpaindis-indis sa 8th International Grave Digging Championship.
Ang tuigan nga kahiwatan, nga nagsugod sang 2016, gina-organisar sang Association of Cemetery Operators and Maintainers sang Hungary.
Ang katuyuan sang kampeonato amo ang pagpasidungog sa propesyon sang grave digger, pagganyat sang mga pamatan-on sa trabaho, kag pagpakita sang ila mga ikasarang.
Dugang pa, luyag kilalahon sang mga organizers ang pagpangabudlay sang mga grave diggers, nga nagakinahanglan indi lamang sang pisikal nga kapagros kundi pati man sang mental nga kusog.
Ang mga partisipante dapat magkutkot sang lulubngan nga nga may sukat sang 2 meters ang kalabaon, 80 centimeters ang kalaparon, kag 1.6 meters ang kadalumon, sa sulod sang duha ka oras.
Pagkatapos sang pagkutkot, kinahanglan man nila ibalik ang ginabanta 2.5 ka tonelada nga duta agud makahimo sang nagakaigo nga lulubngan. Ang pagkutkot ginhusgaran base sa kadasigon, accuracy, kag attention to detail.
Ang kampeonato ginhiwat sang Septyembre 6, nga ang Hungarian team nga Parakletosz Nonprofit Kft ang nagkuha sang una nga pwesto. Ini man ang ila ikaduha nga kadalag-an halin sang nagligad nga tuig.
Samatang, natapos nanday László Kiss kag Robert Nagy ang hangkat sa sulod lamang sang 1 ka oras, 33 minutos, kag 20 segundos.
Pahayag sang Association of Cemetery Operators and Maintainers, ang ila kadalag-an resulta sang ila regular nga eksperyensya sa ila adlaw-adlaw nga trabaho.
