Ginpakigbahin sang ginatawag nga “DDS vloggers” ang naguha nga mandato sang Korte Suprema nga magkomento ang pila ka mga miyembro sang House of Representatives sa ila ginfile nga “Petition for Certiorari and Prohibition” batuk sa ila.
Ini may kaangtanan sa wala pagtambong sang mga gintawag nga “vloggers” sa ginpatigayon nga pagsinapol sang Tri-Committee nga ginakabug-usan sang Public Order and Safety, Public Information, kag Information and Communications Technology matapos gin-angut sa isyu sang “fake news.”
Matandaan nga sadtong Pebrero 18, nagpaguha sang subpoena ang Tri-Committee batuk sa ila matapos wala nagtambong sa pagsinapol sa pihak sang show cause order, sa una nga hearing sadtong Pebrero 4.
Suno naman sa Facebook post sang isa sa mga ginpatawag sang komite nga si anay Presidential spokesperson Atty. Trixie Cruz-Angeles, nagpaguha na sang resolusyon ang Court En Banc nga may petsa Pebrero 11, 2025, kung sa diin naga-require sa mga solon nga magkomento sa petisyon sang “vloggers.”
Mabasa sa resolusyon nga ang mga ginsambit nga solon amu sanday House Speaker Martin Romualdez, Rep. Robert Ace Barbers, subong man mga chairperson sang tatlo ka mga komite nga sanday Rep. Dan Fernandez, Rep. Tobias Tiangco, kag Rep. Jose Aquino II.
Ginahatagan suno diri ang nasambit nga mga mamalidha sang 15 diyas agud magkomento sa petisyon sumugod sa pagkabaton sang notice.
Mahibaluan nga ang nasambit nga resolusyon, pirmado ni Marife M. Lomibao-Cuevas, clerk of court.
Samtang, ang mga nasambit naman nga mga “vloggers” sa resolusyon, magluwas kay Angeles, amu sanday Ernesto Abines Jr., Atty. Glenn Chong, Mark Anthony Lopez, Mary Jean Reyes, Dr. Richard Mata, Lorraine Badoy-Partosa, kag iban pa.
Sa pihak sini, wala pa sang saba, kag reaksyon ang mga miyembro sang HOR angut diri.
