Ginkalipay sang mga supporters ni former President Rodrigo Duterte sa iya pagpakita sa publiko sa ginpatigayon nga status conference sa International Criminal Court ukon ICC.
Sa interview sang Bombo Radyo kay Mr. Jerffrey “Ka Eric” Celiz, secretary general sang Bangon Sambayanan Peoples Movement, iya ginpahayag nga makita ang aura sang anay presidente sa iya mamag-an sa pag-atubang sa kaso nga iya ginapangatubang.
Suno kay Celiz, nagapabilin sa gihapon ang legasiya ni Duterte bisan pa nga natapos na ang iya termino kag preso na ini sa Netherlands samtang ginabista ang mga alegasyon batuk sa iya.
Suno kay Celiz, nangin positibo ang reaksyon sang mga supporters matapos makita sa personal ukon sa livestream ang anay presidente sa ginpatigayon nga hearing.
Nagalaum ang grupo nga mangin matalunsay ang masunod nga proceedings sa kaso kag mahatagan sang kahigayunan si Duterte nga makapauli sa Pilipinas.
