ROXAS CITY – Natigayon nga mapasakaan sang kaso nga murder ang mga suspek sa pagpangluthang-patay kay Liga ng Barangay President kag Brgy. Tabuc Punong Barangay Frederick ‘Dikoy’ Dullano kahapon nga adlaw, Hulyo 20.
Ini ang ginkumpirmar ni PMaj. Syril Punzalan, hepe sang Pontevedra MPS sang mainterview sang Bombo Radyo.
Suno diri, ba-se sa close monitoring sang mga otoridad, pabalhin-balhin sang lokasyon ang mga suspek agud indi gilayon nga ma-locate sang mga kapulisan.
Nagapangayo naman sang pasaylo ang opisyal bangud indi pa posible mapalayag ang pagkakilanlan sang mga suspetsado bangud nagapadayon pa ang imbestigasyon angut sa insidente.
Kaangot diri, nagdangat na sa P600,000 ang gintan-ay nga cash reward sang mga himata ni Kapitan Dullano agud mas mapadasig ang pagtudlo sa insakto nga ginakahamtang sang mga suspek kag ma-interogar sang kapulisan.
Samtang, nagpahamtang man ini sang mga kapulisan sa lugar kun sa diin ginhamyang ang kapitan agud masiguro ang seguridad sang pamilya sang biktima.
